Əsgər Kərimov

Əsgər Kərimov (1941–2024) — tanınmış heykəltəraş; yaratdığı bədii sənət nümunələri Azərbaycanın Bakı, Qəbələ, Şuşa, Şəki, Ağdam və Bərdə şəhərlərində, Ukraynanın Yalta, Türkiyənin İsparta şəhərində və digər yerlərdə qoyulmuşdur.

Əsgər Kərimov
Kərimov Əsgər Şakir oğlu
Əsgər Kərimov.
Doğum tarixi	10 fevral 1941(1941-02-10)
Doğum yeri	Nuxa (indiki Şəki), Azərbaycan SSR, SSRİ
Vəfat tarixi	29 noyabr 2024 (83 yaşında)
Vəfat yeri	İsparta, Türkiyə
Dəfn yeri	İsparta, Türkiyə
Vətəndaşlığı	SSRİ → Azərbaycan
Təhsili	• Əzim Əzimzadə adına Rəssamlıq Məktəbi (Bakı) (1960–1965)  • Tbilisi Rəssamlıq Akademiyası (1969–1975)

Haqqında məlumatlar

10 fevral 1941-ci il tarixdə Nuxada (indiki Şəki) anadan olub.

Təhsili

1960-cı ildə Nuxa şəhər 12 №-li orta məktəbini bitirib.

1960 – 1965-ci illərdə Əzim Əzimzadə adına Rəssamlıq Məktəbində,

1969 – 1975-ci illərdə isə Tbilisi Rəssamlıq Akademiyasında təhsil alıb.

Əmək və yaradıcılıq fəaliyyəti

1975 – 1982-ci illərdə V.İ.Lenin adına Azərbaycan Pedaqoji İnstitutunda,

1982 – 2000-ci illərdə isə Azərbaycanın digər ali məktəblərində rəsm, kompozisiya, heykəltəraşlıq fənlərindən dərs demiş, daha sonra Müstəqil Azərbaycan Universitetinin professoru və dizayn kafedrasının müdiri olmuşdur.

2000 – 2015-ci illərdə əmək və yaradıcılıq fəaliyyətini Türkiyənin İsparta şəhərində davam etdirmiş, sonra isə Bakıya qayıtmışdır.

Məşhur işləri

1969 – 1975-ci illərdə – Tbilisi Rəssamlıq Akademiyasına təhsil alarkən, respublika, ümumittifaq və xarici sərgilərdə öz əsərlərini nümayiş etdirib. “Odlar yurdu” əsəri Drezden muzeyinin daimi eksponatına çevrilib. Akademiyanı bitirərkən diplom işi Nizami Gəncəvinin “İsgəndərnamə” əsəri əsasında yaratdığı üç hissədən ibarət “Odlar diyarı” adlı barelyefi olub. Hansı ki bu iş sonradan Sov.İKP MK-nın Gürcüstanın Risunda şəhərindəki istirahət evində – Sov.İKP MK-nın baş katibinin qəbul otağının divarına vurulub.

1979-cu ildə Azərbaycan SSR xalq rəssamı Cəlal Qaryağdı ilə birlikdə Bərdədə Böyük Vətən müharibəsində həlak olanların xatirəsinə həsr olunmuş kompleksi (memar: Ömər Ömərov) işləyib.

1980-cı ildə 30 sm diametri olan “Uşaqları qoruyun” medalyonu BMT-yə göndərilib.

1982-ci ildə Şəkidə açılışı olmuş M.F.Axundovun tunc abidə kompleksinin (memarlar: E.Qasımzadə, İ.Ələsgərov),

1983-cü ildə açılışı olmuş İsmayıl bəy Qutqaşınlının qəbirüstü abidəsinin (memar: İ.Yüzbaşov),

1985-ci ildə Bakıda İkinci Dünya müharibəsində həlak olanların xatirəsinə ucaldılmış tuncdan hazırlanmış simvolik əsərin (memar: A.Əhmədzadə) və “Şən uşaqlıq” adlı əsərin,

1990-cı ildə Şəki rayonunun İkinci Biləcik kəndində açılışı olmuş Molla Cümənin qranitdən hazırlanmış qəbirüstü abidəsinin müəllifidir.

• 
  Əsgər Kərimovun emalatxanası, Şəki xanı “Hacı Çələbi xan” heykəlinin maketi.
• 
  Şəkidə M.F.Axundovun heykəli.
• 
  Molla Cümənin qəbirüstü abidəsi.
• 
  İsmayıl bəy Qutqaşınlının qəbirüstü abidəsi.
• 
  İsmayıl bəy Qutqaşınlının qəbirüstü abidəsi.

Digər

1965-ci ildən Azərbaycan Bədii Fondunun, 1979-cu ildən SSRİ Rəssamlar İttifaqının, 1980-cı ildən isə SSRİ Bədii Fondunun üzvü olub.

Vəfatı

29 noyabr 2024-cü il tarixdə – 83 yaşında, uzun sürən xəstəlikdən sonra Türkiyənin İsparta şəhərində vəfat edib. Elə həmin gün İsparta qəbiristanlığında – mərhum həyat yoldaşının qəbrinin yanında, dəfn olunub.

Ailəsi

2 oğlu və bir qızı var.

Oğlanları Elnur və Şakir atalarının peşəsini davam etdirirlər.

Ədəbiyyat

1. Məmmədov Ə., Xalıqov F. Kərimov Əsgər // Şəki: Alim və ziyalılar. — Bakı: Bakı Universiteti Nəşriyyatı, 2002. — 2 cilddə. — I  cild. — Səhifələrin sayı:  582. — Səh.: 308. — 1.000 nüsx.
2. Mete Ə. Neynəmişəm ki... // O torpağın övladları. — Bakı: Nurlan, 2006. — Səhifələrin sayı:  608. — Səh.: 300-302. — 500 nüsx.
3. Məmmədov A. Tanınmış heykəltəraş Əsgər Kərimov vəfat edib : [arx. 29 Nov 2024 - 29 Nov 2024] // Turan. — 2024. — 29 noyabr. — Müraciət tarixi: 30.11.2024.