Coşqun Qarabulud

Coşqun Qarabulud
	türk.: Coşkun Karabulut
	Coşqun Qarabulud.
Doğum tarixi	5 noyabr 1956 (67 yaş)
Doğum yeri	Sarıqamış ilçəsi, Qars ili, Türkiyə
Təhsili	Hacəttəpə Universiteti, sosiologiya bölməsi ( – 1980)

Coşqun Qarabulud (türk.: Coşkun Karabulut; d. 5 noyabr 1956-cı ildə) – tanınmış türk şairi və sabiq türk bank işçisi. Ana babası vaxtilə Şəkidən Türkiyəyə köçənlərdən olub və bu səbəbdən də 2017-ci ilin oktyabr ayının 8-də, 115 saylı Şəki kənd ikinci seçki dairəsindən Azərbaycan Respublikası Milli Məclisinə deputat seçilmiş Cavanşir Feyziyevin dəvəti ilə Azərbaycana gəlib, o cümlədən, oktyabr ayının 10-da Şəkidə olub və Şəki şəhər İcra Hakimiyyəti rəhbərliyi tərəfindən qəbul edilib. Oktyabrın 11-də isə Şəki Dövlət Regional Kollecində Coşqun Qarabuludun şərəfinə musiqili proqram nümayiş etdirilmişdir.

Haqqında məlumatlar

5 noyabr 1956-cı il tarixdə Türkiyənin Qars ilinin Sarıqamış ilçəsində anadan olub.

Təhsili

1975-ci ildə Sarıqamış liseyini

1980-cı ildə Hacəttəpə Universitetinin sosiologiya bölümünü bitirib.

Əmək fəaliyyəti

1981 – 2002-ci illərdə Mersin, Adana, Fəthiyə və Quşadasıda müxtəlif bankların filiallarında əməkdaş, yaxud müdir vəzifəsində çalışıb və 2002-ci ildə təqaüdə çıxıb.

2002 – 2005-ci illərdə Fəthiyədə (Muğla) otel işlədib.

2005 – 2014-cü illərdə isə Ölüdəniz bələdiyyəliyində (Fəthiye/Muğla) mədəniyyət evinin (türk.: sanatevi) müdiri olub.

Ədəbi yaradıcılığı

İlk şeiri Mersində çıxan “Senfoni” jurnalında, sonrakı şeir və yazıları isə “Şiir Defteri”, “Maki”, “İlkyaz”, “Tını”, “Lacivert”, “Aykırı Sanat”, “Söylem”, “İzmir İzmir”, “Edebiyat Güncesi”, “Afrodisyas Sanat”, “Turunç”, “Adana Çağdaş Yaşam”, “Karabük Tay” və “Yaşam Sanat” jurnallarında dərc olunub.

Kitabları

Taramak Gökyüzünü (1993);
Bizim Olan Ne Var ki (1996);
Aklımda Sen (2002);
Çizgi (2007);
Beni Zamansız Bırak (2010);
Pılı Pırtı Şiirler (2012).