Mərahim Fərzəlibəyov

Mərahim Fərzəlibəyov
	Mərahim Fərzəlibəyov, 2015-ci il
Doğum tarixi	26 iyun 1949 (74 yaş)
Doğum yeri	Bakı, Azərbaycan SSR, SSRİ
Peşəsi	teatr rejissoru
Mükafatları
IMDb	ID 1076526

Fərzəlibəyov Mərahim Fərzəli oğlu — Azərbaycan Dövlət Akademik Milli Dram Teatrında rejissoru (2006 – 2012-ci illərdə baş rejissor), Azərbaycan Respublikasının xalq artisti (2000).

Haqqında məlumatlar

1949-cu ildə Bakıda anadan olub.

Təhsili

Bakıda 56 saylı orta məktəbi bitirib.

1970 – 1975-ci illərdə Leninqrad Dövlət Teatr, Musiqi və Kinematoqrafıya İnstitutunun^(ru) rejissorluq fakültəsində təhsil alıb.

Əmək fəaliyyəti

Orta məktəbi bitirəndən sonra Azərbaycan Respublikası Jurnalistlər İttifaqının yaradıcılıq fotostudiyasında şagird-lobarant, Suraxanı rayon mədəniyyət evində kinomexanik köməkçisi, 26-lar Mədəniyyət sarayında pioner "Şəfəq" dram dərnəyinin rəhbəri işləyib.

1975 – 1977-ci illərdə təyinatla Qroznı şəhərindəki (Çeçen-İnquş MSSR, RSFSR, SSRİ) Mixail Lermontov adına Dövlət Rus Dram Teatrında quruluşçu rejissor işləyib.

1977 – 1981-ci illərdə Sumqayıt Dövlət Dram Teatrında baş rejissor,

1981 – 2006-ci illərdə M.Əzizbəyov adına Azərbaycan Dövlət Akademik Dram Teatrı/Azərbaycan Dövlət Akademik Milli Dram Teatrında rejissor,

2006 – 2012-ci illərdə Azərbaycan Dövlət Akademik Milli Dram Teatrında baş rejissor vəzifələrinə işləyib.

Yaradıcılığı

Mixail Lermontov adına Dövlət Rus Dram Teatrında Tennessi Uilyamsın “Arzu tramvayı” dramına, Jan Batist Molyerin “Tartüf” komediyasına, Boris Vasilyevin “Qış gecəsinin nağılı” pyesinə, Alla Sokolovanın “Faryatevin fantaziyası” psixoloji tragikomediyasına, Yevgeni Sefip və Nikolay Novitskinin “Yegelyanın səadəti”, uşaqlar üçün Sergey Mixalkovun "“Lovğa dovşan” nağılına səhnə quruluşları verib.

M.Əzizbəyov adına Azərbaycan Dövlət Akademik Dram Teatrı/Azərbaycan Dövlət Akademik Milli Dram Teatrında əsasən çağdaş Azərbaycan dramaturqlarının, həmçinin dünya klassiklərinin əsərlərinə müxtəlif janrlarda səhnə quruluşları verib.

Dəvətlə Naxçıvan Dövlət Musiqili Dram Teatrında Nəriman Həsənzadənin “Pompeyin Qafqaza yürüşü” və “Atabəylər”, Azərbaycan Dövlət Gənc Tamaşaçılar Teatrında Marat Haqverdiyevin “Məhəbbət, şeytan və lambada” (1991) və “Ləyaqət” (1982) pyeslərini tamaşaya hazırlayıb. 1980-ci illərin əvvəllərində Cəfər Cabbarlı adına “Azərbaycanfılm” kinostudiyasının nəzdində fəaliyyət göstərən Kino-Aktyor Teatrı truppası ilə birlikdə Məmməd Muradın “Təkan” (“Köksüz budaqlar”), Tofiq Kazımovun tərcüməsində Qarsia Lorkanın “Qanlı toy”, Qeybulla Rəsulovun çevirməsində Aleksandr Nikitinin “Abşeronda bir gecə” pyeslərinin tamaşalarını səhnəyə qoyub.

Mükafatları

Azərbaycan SSR əməkdar artisti (1982);
Azərbaycan Respublikasının xalq artisti, (2000).
“Şöhrət” ordeni (2019).

Filmoqrafiya

İstinadlar

Ədəbiyyat