Afaq Rəşidova
| Afaq Rəşidova | |
|---|---|
| Rəşidova Afaq Məmməd qızı | |
 | |
| Doğum tarixi | 24 fevral 1956 |
| Doğum yeri |
 SSRİ.svg){kind=small} Azərbaycan SSR, Nuxa |
| Vətəndaşlıq |
SSRİ→ Azərbaycan |
| Elm sahəsi | biologiya |
| İş yeri | AMEA-nın A.İ.Qarayev adına Fiziologiya İnstitutu, aparıcı elmi işçi |
| Elmi dərəcəsi | biologiya üzrə fəlsəfə doktoru |
| Elmi adı | dosent |
| Təhsili | Azərbaycan Dövlət Pedaqoji İnstitutu |
Afaq Rəşidova (Rəşidova Afaq Məmməd qızı; d. 24 fevral 1956, Nuxa, Azərbaycan SSR, SSRİ) – azərbaycanlı alim, biologiya üzrə fəlsəfə doktoru, AMEA-nın A.İ.Qarayev adına Fiziologiya İnstitutunun aparıcı elmi işçisi.
Haqqında məlumatlar
1956-cı ildə Nuxa şəhərində anadan olub.
1961-ci ildə ailəsi ilə birlikdə Bakıya köçüb.
1977-ci ildə Nəsrəddin Tusi adına Azərbaycan Dövlət Pedaqoji Universitetinin biologiya fakültəsini bitirib.
İş yerləri
1977–ci ildən Azərbaycan SSR EA-nın Fizika İnstitutunun Molekulyar biologiya və molekulyar genetika bölməsinin Tibbi-biokimyəvi genetika laboratoriyasında baş laborant (1977-1982), kiçik elmi işçi (1982-1994), böyük elmi işçi (1994-1998), AMEA-nın akademik Abdulla Qarayev adına Fiziologiya İnstitutunun Müqayisəli və yaş neyrokimyası laboratoriyasında, sonra isə Sinir sisteminin energetik mübadilə fermentləri yaradıcı sektorunda böyük elmi işçi (1998-2008) vəzifələrində çalışıb. 2008-ci ildən Ontogenezin biokimyası laboratoriyasında aparıcı elmi işçi vəzifəsini icra edir.
Elmi fəaliyyəti
1992-ci ildə Moskva şəhərindəki (Rusiya Federasiyası) Hematologiya və Qanköçürmə İnstitutunda biokimya ixtisası üzrə namizədlik dissertasiyasını müvəffəqiyyətlə müdafiə edib.
2007-ci ildə Azərbaycan Respublikası Prezidenti yanında Ali Attestasiya Komissiyasının qərarı ilə biokimya ixtisası üzrə dosent elmi adını alıb.
2012-ci ildə biokimya ixtisası üzrə doktorluq dissertasiyasının mövzusu Problem Şurasında qeydiyyatdan keçmiş və təsdiqlənmişdir. Doktorluq dissertasiyası üzərində işləyir və onu tamamlamaq ərəfəsindədir.
100-dən artıq elmi əsərin müəllifidir. Onlardan 1-i tam fəsil kitabda (ABŞ-da), 7 məqaləsi isə xaricdə (Avstriya, Türkiya, Polşa, Ukrayna, Rusiya) nüfuzlu jurnallarda çap olunaraq impakt faktora malikdirlər. Çoxsaylı məqalə və tezisləri ABŞ, İtaliya, İspaniya, Türkiyə, Gürcüstan, Ukrayna, Rusiya, Moldova, Avstriya, Polşa, İran və s. ölkələrdə nəşr olunub. Apardığı işlərin nəticəsi kimi müxtəlif enzim və hemoqlobinopatiyaların biokimyəvi və molekulyar əsasları, etnik xüsusiyyətləri, yayılması, biokimyəvi mexanizminin öyrənilməsi, sensor impulsasiyaların çatışmaması şəraitində və zülal açlığı zamanı postnatal ontogenezdə transaminaza ferment qrupu, qlükoza mübadiləsinin tənzimləyici fermentlərinin və zülalın, eyni ilə neft mənşəli bəzi toksiki maddələrin, elektromaqnit dalğaları ilə qeyri-ionlaşdırıcı şüalanmanın və hipoksiyanın baş beyin qabığının müxtəlif nahiyyələrində, hipotalamusda və beyincikdə energetik mübadiləyə təsiri dinamikasına aid maraqlı nəticələr alıb və elmi tədqiqatlarla sübuta yetirmişdir.
4 Beynəlxalq və yerli qrant layihəsinin fəal icraçısı olub (ABŞ, Azərbaycan). Bununla bərabər Beynəlxalq və Respublika elmi konqreslərin, simpoziumların, konfransların işində iştirak edib, sertifikatlarla təltif olunub.
İctimai fəallığı
- MDB ölkələrinin Fizioloqlar cəmiyyətinin üzvüdür.
- AMEA-nın akademik Abdulla Qarayev adına Fiziologiya İnstitutunun nəzdində biokimya ixtisası üzrə fəlsəfə doktoru elmi dərəcəsi almaq üçün fəaliyyət göstərən şuranın üzvüdür.
- AMEA-nın akademik Abdulla Qarayev adına Fiziologiya İnstitutunun “Fiziologiya” jurnalının redaksiya heyətinin üzvüdür.
Mükafatları
«Gənc alimlərin və mütəxəssislərin elmi konfransında ən yaxşı elmi-tədqiqat işi üçün» diplom (1991).
Ailəsi
Oğlu – Ülvi Rəşid, 1986 il təvəllüdlü, Azərbaycan Dövlət Neft və Sənaye Universitetinin məzunu, Azərbaycan Respublikası Prezidentinin təqaüdçüsü, “Золотой резерв нефтегаза-2008” Beynəlxalq layihənin qalibidir. 2018-ci ildə ABŞ-ın Karnegi Mellon Universitetinin (Pensilvaniya ştatı, Pittsburq şəhəri) magistraturasını uğurla bitirmiş, ABŞ-ın Kaliforniya Ştatında işə dəvət olunmuş və hal-hazırda orada fəaliyyət göstərir.