Dürrə Məmmədova

Dürrə Məmmədova
Məmmədova Dürrə Əlabbas qızı
Dürrə Məmmədova
Doğum tarixi	25 dekabr 1923(1923-12-25)
Doğum yeri	Nuxa, Nuxa qəzası, Azərbaycan SSR, ZSFSR, SSRİ
Vəfat tarixi	25 avqust 2005 (81 yaşında)
Vəfat yeri	Bakı, Azərbaycan
Vətəndaşlıq	SSRİ→ Azərbaycan
Təhsili	Bakı Əczaçılıq Texnikumunu ( – 1940)
Mükafatları

Dürrə Məmmədova(1923 – 2005) — Böyük Vətən müharibəsində iştirak etmiş azərbaycanlı qadın-tibb işçisi, baş leytenant, Azərbaycan SSR əməkdar səhiyyə işçisi. “Florens Naytingel” medalı ilə təltif olunmuş cəmi 12 azərbaycanlı tibb bacısından biridir. 1995 və 2000-ci illərdə Moskvada Qızıl Meydanda keçirilən paradlarda iştirak edib.

Haqqında məlumatlar

25 dekabr 1923-cü ildə Nuxada anadan olub.

Təhsili

1940-cı ildə Bakı Əczaçılıq Texnikumunu bitirib.

Hərbi xidmətdə

22 iyun 1941-ci il tarixdə Böyük Vətən müharibəsinin başlamasından sonra könüllü olaraq cəbhəyə gedib. Əvvəlcə Novorossiysk şəhər 43 №-li hərbi-dəniz hospitalının sərəncamına göndərilib, sonra Novorossiysk Hərbi-Dəniz Bazasının sanitar anbarına köçürülüb. Burada tibb işçisi kimi 18-ci Ordunun Qara dəniz hərbi hissələrinin dərmanlarla, sarğı ləvazimatları və tibbi avadanlıqlarla təchizi məsələləri ilə məşğul olmuş, yaralılara da yardım göstərmişdir. Sovet qoşunları Novorossiysk şəhərini tərk etdikdən sonra isə Gəlincik və Karbardinkada döyüş meydanlarında fəaliyyət göstərib.

Xidmətlərinə görə bir neçə orden 13 medalla təltif olunub. 1948-ci ilədək hərbi qulluqda saxlanılmış, Hərbi-Dəniz Donanmasının 41 və 45 №-hospitallarında aptek müdiri vəzifəsində çalışmışdır.

Əmək fəaliyyəti

1940 – 1941-ci illərdə Nuxadakı 85 №-aptekdə işləyib.

1948 – 1961-ci illərdə əmək fəaliyyətini Leninqradda, Uzaq Şərqdə, Port-Arturda (ÇXR),

1961-ci ildən isə Bakıdakı 329 saylı aptekdə davam etdirib.

1978-ci ildə fərdi pensiyaya çıxıb.

İctimai aktivliyi

3 dəfə Bakı şəhəri Sovetinə deputat,

2 dəfə SSRİ Müharibə Veteranları Komitəsinin plenumuna üzv seçilib.

Digər

1998-ci ildə Azərbaycan Respublikasının prezidenti Heydər Əliyevlə görüşdə, Heydər Əliyev onun cavan qalmasına və səliqəsinə işarə edərək belə deyib:

Mən səni artıq 30 ildir ki, tanıyıram. Bu müddət ərzində sən heç dəyişməmisən. 30 il əvvəl də elə belə idin.

Mükafatları

• “Qırmızı Ulduz” ordeni;
• II dərəcəli “Vətən Müharibəsi” ordeni;
• SSRİ tibb xidməti əlaçısı
• Azərbaycan SSR əməkdar səhiyyə işçisi (1981).
• Beynəlxalq Qızıl Xaç və Qızıl Aypara Hərəkatının ən ali mükafatı olan “Florens Naytingel” medalı (2005).

Vəfatı

25 avqust 2005-ci il tarixdə – 81 yaşında, Bakıda vəfat edib.

İstifadə edilmiş mənbələr

• Mete Ə. Şəfqətli döyüşlər // O torpağın övladları. — Bakı: Nurlan, 2006. — Səhifələrin sayı:  608. — Səh.: 355 – 356. — 500 nüsx.
• Naibə (7 – 10 may, 2011). "Qələbə günündən qələbə gözləntisi". http://anl.az/ (azərb.). “Həftə içi” qəzeti. 23 Dec 2020 tarixində arxivləşdirilib.
• Əsədov Q. Şəki və onun təbabət tarixi. — Bakı: “Qanun”, 2016. — ISBN 978-9952-36-282-4. Arxivləşdirilib; arxivləşdirmə tarixi: 1 Nov 2018 - 29 Jan 2020.