Ədəbiyyat:İkram Ağasıyev (tərcümeyi-hal)
AĞASİEV İKRAM KƏRİM OĞLU,
tarix elmləri doktoru, professor.
İ.K.Ağasiyev 1963-cü il oktyabrın 18-də Azərbaycan Respublikasının Şəki rayonunun Biləcik kəndində anadan olmuşdur. O, kənd məktəbini əla qiymətlərlə bitirmiş, təhsilini doğma Azərbaycan dilində almışdır. 1981-ci ildə ordu sıralarına çağırılmış, Ukraynanın Lvov və Rivne şəhərlərində hərbi xidmətdə olub. 1983-cü ilin dekabrında ordudan tərxis olunmuş və Ukraynanın Lutsk şəhərində PMK-173-də dülgər işləməyə başlamışdır. 1984-cü ildə Lutsk şəhərində Lesya Ukrainka adına Volın Dövlət Universitetinin tarix fakültəsinə daxil olmuş və Universiteti fərqlənmə diplomu ilə bitirmişdir.
1988-1992-ci illərdə Volın diyarşünaslıq muzeyində elmi işçi kimi fəaliyyətə başlamışdır. Eyni zamanda, 1989-cu ildə Ukrayna Milli Elmlər Aka-demi¬yasının Tarix İnstitutuna dissertant kimi qəbul olmuş, “Almaniya Demokratik Respublikası və Ukrayna SSR arasında münasibətlər (1949-1989)” mövzusunda dissertasiya üzərində tədqiqatlar aparmışdır. Məlum tarixi hadisələrdən sonra tədqiqat aktuallığını itirdiyindən İ.K.Ağasiyev 1992-ci ildə yenidən Volın Dövlət Universitetinin əyani aspiranturasına daxil olmuş və prof. O.Mixaylyukun rəhbərliyi ilə Volın vilayətində alman koloniyalarının tarixini araşdırmağa başlamışdır. 1994-cü ildə O.Mixaylyukun vəfatından sonra onun elmi rəhbərləri professor İ.M.Kuliniç (Kiyev) və V.K.Baran (Lutsk) olmuşlar. 1995-ci ildə aspiranturanı bitirmiş, aspiranturadan sonra Rusiyanın Krasnoyarsk Dövlət Pedaqoji Universitetində işləmişdir. 1999-cu ildə KDPU-nun dissertasiya şurasında "Volın vilayətindəki alman koloniyaları (XVIII-ci əsrin sonu - 1917-ci ilə qədər)" mövzusunda namizədlik dissertasiyasını müdafiə etmiş, tarix elmləri namizədi elmi dərəcəsini qazanmışdır.
2002-ci ilin sonlarında İ.K.Ağasiyev ana vətənə - Azərbaycana qayıtmışdır və 2003-cü ildən Azərbaycan Milli Elmlər Akademiyasının A.A.Bakıxanov adına Tarix İnstitutunun “Qafqaz tarixi” şöbəsində böyük elmi işçi, aparıcı elmi işçi və Baş elmi işçi vəzifələrində çalışmışdır. Tədqiqatçının əsas tədqiqat obyekti Qafqaz regionunda mövcud olmuş alman koloniyalarının tarixi olmuşdur və 2012-ci ildə Bakı Dövlət Universiteti nəzdindəki Müdafiə Şurasında “Qafqazda alman koloniyalarının yaranması və onun regional xüsusiyyətləri” mövzusunda doktorluq dissertasiyasını uğurla müdafiə etmişdir. 2016- 2019-cu illərdə “Dərbənd tarixi” elmi-tədqiqat bölməsinin, 2019-2022-ci illərdə “Azərbaycan-Rusiya əlaqələri tarixi” şöbəsinin müdiri vəzifələrini yerinə yetirmişdir. 2023-cü ildən “Azərbaycanın Sovet dövrü tarixi” şöbəsinin müdiridir.2014-2018-ci illərdə Azərbaycan Prezidenti yanında Ali Attestasiya Komissiyasının Tarix və Siyasi elmlər üzrə Ekspert Şurasının üzvü olmuşdur. Hal-hazırda A.A.Bakıxanov adına Tarix İnstitutunun Elmi Şurasının və Müdafiə Şurasının üzvüdür.
Prof.İ.K.Ağasiyev eyni zamanda pedaqoji fəaliyyətlə də məşğuldur.2003-cü ildən Bakı Biznes Universitetinin “Humanitar elmlər” kafedrası ilə əməkdaşlıq edir.Bu dövr ərzində 18 tədris proqramı hazırlamış, “Azərbaycan tarixi” fənni üzrə dərslik və dərs vəsaitinin müəllifidir. Onun hazırladığı və 2015-ci ildə çap etdirdiyi “Azərbaycan tarixi (sxemlərdə, xəritələrdə, cədvəllərdə)” adlı dərs vəsaiti hələlik bu xüsusda çap olunan yeganə vəsaitdir. O, həmçinin qısa bir dövr Bakı Slavyan Universitetində “Ukraynanın beynəlxalq münasibətləri” fənnini də tədris etmişdir. 2007-ci ildə dosent, 2018-ci ildə isə professor elmi adına layiq görülmüşdür. O, gənc nəslin təlim-tərbiyəsində xidmətlərinə görə Universitet daxili müxtəlif mükafatlara layiq görülmüş, o cümlədən Azərbaycan Təhsil Nazirinin Fəxri Fərmanı ilə təltif edilmişdir. İ.K.Ağasiyev bu günə qədər Ukrayna və Qafqazın alman əhalisinin tarixinə, Dərbənd bölgəsinin və Şimali Qafqazın digər bölgələrinin problemlərinə həsr olunmuş 154 elmi əsərin müəllifidir. Alimin 3 monoqrafiyası Azərbaycandan kənarda-Almaniyada və Türkiyədə, 44 məqaləsi isə - Türkiyə, Ukrayna, Rusiya, Rumıniya, Gürcüstan və İsveçdə nəşr olunmuşdur. O, Azərbaycanda və xaricdə keçirilən 39 beynəlxalq konfransda tədqiq olunan mövzular ilə bağlı çıxışlar etmişdir.
İkram Ağasıyevin tələbələri arasında müxtəlif dövlət qurumlarında çalışan məmurlar, alimlər, professor-müəllim heyəti var. Gənc aspirantların və dissertantların elmi rəhbəridir.
Alman-Azərbaycan Cəmiyyətinin üzvüdür. Rus, Ukrayna, türk və alman dillərini mükəmməl bilir.
Ailəlidir, bir oğlu, bir qızı var.
Həmçinin, bax: İkram Ağasıyev