Məmməd Əfəndiyev (iqtisadçı)

Məmməd Əfəndiyev
Əfəndiyev Məmməd Məmməd oğlu
Məmməd Əfəndiyev.
Doğum tarixi	31 dekabr 1907(1907-12-31)
Doğum yeri	Nuxa (indiki Şəki), Yelezavetpol quberniyası, Rusiya İmperiyası
Vəfat tarixi	2 aprel 1987 (79 yaşında)
Vəfat yeri	Kirovabad (indiki Gəncə), Azərbaycan SSR, SSRİ
Vətəndaşlıq	SSRİ
Elm sahəsi	kənd təsərrüfatı və iqtisadiyyat
Elmi dərəcəsi	kənd təsərrüfatı elmləri namizədi
Elmi adı	dosent
Təhsili	• Zaqafqaziya Kommunist Universiteti (Tiflis (indiki Tbilisi); 1928–1932)  • K.A.Timiryazev adına Moskva Kənd Təsərrüfatı Akademiyası, aspirantura (1933–1937)
Həyat yoldaşı	Babayeva Nailə İdris bəy qızı
Evladları	Aleksey Əfəndiyev, Şəhla Əfəndiyeva, İffət Əfəndiyeva və İzzət Əfəndiyeva
Mükafatları

Məmməd Əfəndiyev (1907–1987) — kənd təsərrüfatı sahəsi üzrə tanınmış alim və pedaqoq, kənd təsərrüfatı elmləri namizədi, dosent, Azərbaycan SSR əməkdar iqtisadçısı. Uzun müddət indiki Gəncədəki Azərbaycan Dövlət Aqrar Universitetində kənd təsərrüfatı müəssisələrində istehsalın təşkili kafedrasının rəhbəri olmuş, bir müddət isə kənd təsərrüfatının iqtisadiyyatı fakültəsinin dekanı vəzifəsini tutmuşdur (bu fakültənin yaradıcısı və ilk dekanıdır).

Haqqında məlumatlar

31 dekabr 1907-ci il tarixdə Nuxanın (indiki Şəki) Giləhli məhəlləsində anadan olub.

Təhsili

1923 – 1926-cı illərdə Bakıda fəhlə fakültəsində,

1928 – 1932-ci illərdə Zaqafqaziya Kommunist Universitetində (Tiflis, indiki Tbilisi),

1933 – 1937-ci illərdə K.A.Timiryazev adına Moskva Kənd Təsərrüfatı Akademiyasının aspiranturasında təhsil alıb.

Əmək fəaliyyəti

1926 – 1928-ci illərdə Nuxada,

1932 – 1933-cü illərdə isə əvvəl Lənkəranda, sonra isə Kirovabadda (indiki Gəncə) komsomol və partiya işində çalışıb.

1937 – 1984-cü illərdə Azərbaycan Kənd Təsərrüfatı İnstitutunda (Kirovabad) işləyib; o cümlədən,

1937 – 1984-cı illərdə kənd təsərrüfatı müəssisələrində istehsalın təşkili kafedrasında əvvəl baş müəllim, sonra dosent, daha sonra professor,

1937 – 1976-cı illərdə kafedranın rəhbəri,

1959 – 1966-cı illərdə isə kənd təsərrüfatının iqtisadiyyatı fakültəsinin dekanı olub.

İkinci iş yerləri

Böyük Vətən müharibəsi dövründə (1941–1945) AKTİ Tədris təsərrüfatına rəhbərlik edib, Kirovabad radiosunda xəbərlərin tərcüməçisi, Ağstafa, Şəmkir kolxozlarında iqtisadçı olaraq çalışıb.

Elmi fəaliyyəti

1937-ci ildə kənd təsərrüfatı elmləri namizədi elmi dərəcəsi, sonralar isə dosent elmi adını alıb.

Azərbaycan Kənd Təsərrüfatı İnstitutunda işlədiyi müddət ərzində kənd təsərrüfatının iqtisadiyyatı, təşkili və planlaşdırılması sahəsi üzrə 21 elmlər namizədi yetişdirib. 70-ə yaxın elmi əsərin müəllifidir.

İctimai-siyasi aktivliyi

1941-ci ildən kommunist partiyasının üzvü olub. Azərbaycan Kənd Təsərrüfatı İnstitutunda işlədiyi müddət ərzində dəfələrlə fakültə partiya təşkilatının katibi, institut və şəhər partiya komitələrin üzvü, şəhər sovetinin deputatı seçilib.

1970-ci illərdə dəfələrlə Özbəkistanın və Tacikistanın kənd təsərrüfatı institutlarında dövlət imtahan komissiyalarının sədri, Azərbaycan SSR Kənd Təsərrüfatı Nazirliyi və Təhsil Nazirliyinin iqtisadi şurasının, Azərbaycan SSR Elmlər Akademiyasının koordinasiya şurasının, Lenin adına Ümumittifaq Kənd Təsərrüfatı Elmlər Akademiyasının Zaqafqaziya filialın iqtisadi bölməsinin üzvü olub.

Dəfələrlə Moskva şəhərində Ümumittifaq Kənd Təsərrüfatı Sərgisində iştirak edib.

Təltif və mükafatları

• “Qafqazın müdafiəsinə görə” medalı;
• Lenin yubiley medalı (1970);
• “1941–1945-ci illər Böyük Vətən müharibəsində qələbənin 30 illiyi” yubiley medalı (1975);
• “Azərbaycan SSR əməkdar iqtisadçısı” fəxri adı (1980).

Vəfatı

2 aprel 1987-ci il tarixdə – 79 yaşında, Kirovabadda vəfat edib. Orada Fəxri xiyabanda dəfn olunub.

Xatirəsi

Azərbaycan Dövlət Aqrar Universitetində (Gəncə) bir auditoriyaya adı verilib.

Ədəbiyyat

1. Məmmədov Ə., Xalıqov F. Əfəndiyev Məmməd // Şəki: Alim və ziyalılar. — Bakı: Bakı Universiteti Nəşriyyatı, 2002. — 2 cilddə. — I  cild. — Səhifələrin sayı:  582. — Səh.: 157-158. — 1.000 nüsx.