Yusif Səfərov

Yusif Səfərov
	Səfərov Yusif Həbibulla oğlu
	Yusif Səfərov.
Doğum tarixi	2 may 1921
Doğum yeri	Nuxa (indiki Şəki), Nuxa qəzası, Azərbaycan SSR
Vəfat tarixi	19 iyul 2002 (81 yaşında)
Vəfat yeri	Bakı, Azərbaycan SSR, SSRİ
Dəfn yeri	Xırdalan qəbiristanlığı, Bakı, Azərbaycan
Vətəndaşlıq	SSRİ→ Azərbaycan
Elm sahəsi	tarix
Elmi dərəcəsi	tarix elmləri doktoru
Elmi adı	professor
Təhsili	• S.M.Kirov adına Azərbaycan Dövlət Universiteti, tarix fakültəsi (1939–1941; 1947–1951) • M.V.Lomonosov adına Moskva Dövlət Universiteti, aspirantura (1951–1954)
Həyat yoldaşları	Səfərova Zivər Qurban qızı
Evladları	Kənan və Sənan
Atası	Həbibulla Səfərov
Anası	Xədicə Hüseynova
Mükafatları
Adının digər versiyaları	Yusif Seferov, Yusif Safarov, Юсиф Сафаров, Юсиф Сеферов, Јусиф Сәфәров, Јусиф Сеферов

Yusif Səfərov (1921–2002) — tanınmış tarixçi alim, tarix elmləri doktoru, professor; Azərbaycanda tarixşünaslıq fənninə dair ilk dərsliyin müəllifidir.

Haqqında məlumatlar

2 may 1921-ci il tarixdə Nuxada (indiki Şəki) anadan olub.

Təhsili

1939-cu ildə Nuxa şəhər 11 №-li tam orta məktəbini bitirib.

1939 – 1941 və 1947 – 1951-ci illərdə S.M.Kirov adına Azərbaycan Dövlət Universitetinin tarix fakültəsində,

1951 – 1954-cü illərdə isə M.V.Lomonosov adına Moskva Dövlət Universitetinin aspiranturasında təhsil alıb.

Hərbi xidmətdə

5 avqust 1941-ci il tarixində Bakı şəhərinin Voroşilov Rayon Hərbi komissarlığından Sovet Ordusunda xidmətə götürülüb.

1945-ci ilin 19 aprelində Almaniyanın Frankfurt şəhəri uğrunda gedən döyüşlərdə ayağından ağır yaralanıb. Bundan sonra gəzmə qabiliyyətinin bərpası üçün 1945-ci ilin aprelindən 1947-ci ilin iyununa qədər SSRİ-nin müxtəlif hospitallarında ondan artıq cərrahiyyə əməliyyatları keçirilib.

19 iyun 1947-ci il tarixdə II qrup əlil kimi ordudan tərxis olunub.

Əmək fəaliyyəti

1954-cü ildən S.M.Kirov adına Azərbaycan Dövlət Universitetində işləyib; o cümlədən,

1954-cü ildən tarix fakültəsində müəllim,

1955-ci ildən baş müəllim və kafedranın dosenti, sonra SSRİ tarixi kafedrasının müdiri, daha sonra mənbəşünaslıq, tarixşünaslıq və tarixin tədrisi üsulları kafedrasının professoru olub.

Elmi fəaliyyəti

1954-cü ildə M.V.Lomonosov adına Moskva Dövlət Universitetində “1806 – 1812-ci illər Rusiya – Türkiyə müharibəsi (Qafqaz cəbhəsi)” mövzusunda namizədlik,

1994-cü ildə isə Bakıda “Azərbaycanın qədim tarixinin tarixşünaslığı” mövzusunda doktorluq dissertasiyasını müdafiə edib.

Azərbaycanda tarixşünaslıq fənninə dair ilk dərsliyin, 100-dən çox elmi monoqrafiya, məqalə, metodik vəsait, dərs vəsaiti və proqramların müəllifidir.

Elmi-ictimai fəaliyyəti

Uzun müddət Azərbaycan SSR Elmlər Akademiyasının terminologiya komissiyasının üzvü olub.

Təltif və mükafatları

“Qafqazın müdafiəsinə görə” medalı;
“Qırmızı Ulduz” ordeni (04.03.1945);
“Varşavanın azad edilməsinə görə” medalı;
“Qırmızı Bayraq” ordeni;
II dərəcəli “Vətən Müharibəsi” ordeni;
I dərəcəli “Vətən Müharibəsi” ordeni (06.04.1985);
SSRİ Ali Baş Komandanlığının fəxri fərmanı ilə təltif olunmuşdur;
“Tərəqqi” medalı – Məmmədəmin Rəsulzadə adına Bakı Dövlət Universitetinin 80 illiyi münasibəti ilə elm və təhsil sahələrində xidmətlərinə görə (11 fevral 2000-ci il).

Vəfatı

19 iyul 2002-ci il tarixdə – 81 yaşında, Bakıda vəfat edib. Xırdalan qəbiristanlığında dəfn olunub.

Ailəsi

Atası: Həbibulla Səfərov, pinəçi olub, yaşının çox olmasına baxmayaraq, oğlundan sonra o, da müharibəyə getmiş, 1943-cü ildə Kerç uğrunda gedən döyüşdə ağır yaralanmış, oğlu Yusif Səfərovun qolları arasında vəfat etmişdir.

Anası: Xədicə Məhəmməd qızı Hüseynova, evdar qadın olub.

Həyat yoldaşı: Səfərova Zivər Qurban qızı, Çingiz İldırım adına Azərbaycan Politexnik İnstitutunun kitabxanasının müdiri olub, 2022-ci ilin yanvar ayında vəfat edib.

Övladları: Sənan və Kənan adlı iki oğlu var. Hər ikisi hüquqşünasdır. Sənan həm də şərqşünasdır. Yəməndə və Liviyada hərbi sahədə çalışıb. Uzun müddət Azərbaycan Beynəlxalq Bankının departament direktoru vəzifəsində işləyib. Hal-hazırda MQS şirkətinin hüquqşünasdır. Digər oğlu Kənan isə sovet dövründə Kiyevdə hüquq və diplomatik sahədə təhsil alıb. 1984 – 1992-ci illərdə Azərbaycan SSR/Azərbaycan Respublikası DİN Mühafizə Xidmətində və Sumqayıt şəhər polis idarəsində müstəntiq işləyib. 1992 – 1994-cü illərdə Azərbaycan Xarici İqtisadi Əlaqələr Nazirliyində departament direktoru, sonra uzun müddət ABŞ şirkətində hüquqşünas vəzifəsində çalışıb. Eyni vaxtda Bakı dövlət Universitetində xarici hüquqdan da dərs deyib. Daha sonra isə Enerji Qrupun İdarə Heyətinin sədr müavini kimi fəaliyyət göstərib. Hal-hazırda vəkillik edir və Vəkillər Kollegiyasının üzvüdür.

Ədəbiyyat

Сафаров Юсуф Габибулаевич : [arx. 25.07.2021] : [rus.] // Память народа. — Müraciət tarixi: 25.07.2021.
Сафаров Юсиф Габибулла-оглы : Орден Отечественной войны I степени : [arx. 25.07.2021] : [rus.] // Память народа. — Müraciət tarixi: 25.07.2021.
Məmmədov Ə., Xalıqov F. Səfərov Yusif // Şəki: Alim və ziyalılar. — Bakı: Elm, 2007. — 2 cilddə. — II cild. — Səhifələrin sayı: 428. — Səh.: 348-354. — 600 nüsx. — ISBN 5-8066-1708-4.
Səfərov Yusif Həbibulla oğlu (1921-2002) : [arx. 18 Jun 2017 - 11 Apr 2020] // Bakı Dövlət Universiteti. — Müraciət tarixi: 25.07.2021.