Ənvər Qarayev

Ənvər Qarayev
Qarayev Ənvər Vahid oğlu
Ənvər Qarayev.
Doğum tarixi	18 fevral 1947(1947-02-18)
Doğum yeri	Nuxa (indiki Şəki), Azərbaycan SSR, SSRİ
Vəfat tarixi	29 yanvar 2011 (63 yaşında)
Vəfat yeri	Bakı, Azərbaycan
Dəfn yeri	Bakı, Azərbaycan
Vətəndaşlığı	SSRİ→ Azərbaycan
Fəaliyyəti	rəssam
Təhsili	• Əzim Əzimzadə adına Rəssamlıq Məktəbini (–1967)  • Mirzağa Əliyev adına Azərbaycan Dövlət İncəsənət İnstitutu, rəssamlıq fakültəsi (1967–1973)
Mükafatları

Ənvər Qarayev (1947–2011) — tanınmış rəssam və dekorativ-tətbiqi sənət ustası, Azərbaycan Respublikasının əməkdar rəssamı, Azərbaycan Rəssamlar İttifaqının Rəyasət heyətinin üzvü, sədrin müşaviri və dekorativ-tətbiqi sənət bölməsinin sədri.

Haqqında məlumatlar

18 fevral 1947-ci il tarixdə Nuxada (indiki Şəki), ziyalı ailəsində anadan olub.

Təhsili

1962-ci ildə Bakı şəhər 25 №-li orta məktəbinin (Oktyabr rayonu, indiki Yasamal rayonu) 8-ci sinfini,

1967-ci ildə isə Əzim Əzimzadə adına Rəssamlıq Məktəbini bitirib.

1967 – 1973-cü illərdə Mirzağa Əliyev adına Azərbaycan Dövlət İncəsənət İnstitutunun rəssamlıq fakültəsində təhsil alıb.

Hərbi xidmət

1973-cü ildə institutu bitirdikdən sonra hərbi xidmətdə olub.

Əmək fəaliyyəti

1975 – 1977-ci illərdə Uşaqların təsviri yaradıcılığı üzrə metodik mərkəzin direktor müavini,

1977 – 1981-ci illərdə Azərbaycan SSR Nazirlər Soveti yanında Dövlət Radio və Televiziya Verilişləri Komitəsində quruluşçu rəssam vəzifəsində çalışıb.

Yaradıcılığı

Rəssamlığın müxtəlif sahələri ilə və eləcə də dekorativ-tətbiqi sənətin müxtəlif növləri (keramika, qrafika, monumental keramik panno, bədii metal, ağac üzərində oyma, qobelen, batika və s) ilə məşğul olub.

Dünyanın bir çox ölkələrində – Almaniyada, Polşada, Avstriyada, Macarıstanda, Rusiyada, Türkiyədə, Misirdə, təşkil olunmuş rəssamlıq sərgilərində iştirak edib. Moskvadakı Şərq Muzeyində “Çovqan”, Berlin Dekorativ İncəsənət Muzeyində “Cıdır”, Antalya Rəssamlıq Qalereyasında “Türkün sözü” əsərləri saxlanılır.

Digər

1976-cı ildən SSRİ Rəssamlar İttifaqının üzvü olub.

Həyatının son illərində Azərbaycan Rəssamlar İttifaqının Rəyasət heyətinin üzvü, sədrin müşaviri və dekorativ-tətbiqi sənət bölməsinin sədri idi.

Azərbaycan Milli Elmlər Akademiyasının müxbir üzvü, Azərbaycan Milli Elmlər Akademiyası Nizami adı­na Ədə­biyyat Dil İnstitutunun direktoru Yaşar Qarayevin (1936–2002) kiçik qardaşıdır.

Təltif və mükafatları

• “Azərbaycan Respublikasının əməkdar rəssamı” fəxri adı — 30 may 2002.

Vəfatı

29 yanvar 2011-ci il tarixdə – 63 yaşında, Bakıda vəfat edib. Bakıda Köhnə qəbiristanlıqda dəfn olunub.

Ədəbiyyat

1. Məmmədov Ə., Xalıqov F. Qarayev Ənvər // Şəki: Alim və ziyalılar. — Bakı: Elm, 2007. — 2 cilddə. — II  cild. — Səhifələrin sayı:  428. — Səh.: 226-227. — 600 nüsx. — ISBN 5-8066-1708-4.
2. "Hər əsərində dekorativliyə meyl edən rəssam". yeniavaz.com. 19 fevral 2020 tarixində arxivləşdirilib. İstifadə tarixi: 19 fevral 2020.