Mirzə Fətəli Axundovun ev muzeyi

Şəki Ensiklopediyası səhifəsi
Jump to navigation Jump to search
Mirzə Fətəli Axundovun ev muzeyi
Mirzə Fətəli Axundovun ev muzeyi
Ümumi görünüş
Açılış tarixi 1940-cı il
Mövzu Xatirə muzeyi
Yerləşir Coat of arms of Shaki.jpg Şəki
Ünvan M.F.Axundov küç., 43 [1]
Kolleksiyası 248 eksponat

Mirzə Fətəli Axundovun ev muzeyi — Azərbaycan yazıçısı, maarifçisi, şairi, materialist filosofu və ictimai xadimi, Azərbaycan dramaturgiyasının banisi Mirzə Fətəli Axundovun Şəkidə yerləşən ev-muzeyi. Axundov bu evdə doğulub və onun uşaqlıq və yeniyetməlik dövrləri də burada keçib. Bu muzey həm də Azərbaycanda açılmış ilk xatirə muzeyidir[2].

Tarixi[redaktə | HTML redaktə]

Ev 1800-cü ildə tikilib. 1811-ci ildə isə Mirzə Fətəli Axundovun atası Mirzə Məhəmməd Tağı tərəfindən alınıb. 1812-ci ildə burada Mirzə Fətəli Axundov dünyaya gəlib. 2 il sonra Fətəlinin atası ailəsi ilə birlikdə Təbriz yaxınlığındakı Xamnə qəsəbəsinə köçüb. Mirzə Fətəlinin 13 yaşı olanda valideynləri boşanırlar. Sonradan 1825-ci ildə Fətəli anası ilə birlikdə Nuxaya geri dönüb. O, 1833-cü ildə Nuxada açılmış rus məktəbinə daxil olub və bir il burada təhsil aldıqdan sonra 1834-cü ildə Tiflisə gedib.

1940-cı ildə bu evdə muzey yaradılıb. 2012-ci ildə M.F.Axundovun 200 illik yubileyi ərəfəsində muzey əsaslı şəkildə təmir olunub.

Haqqında[redaktə | HTML redaktə]

Şəkidə yerləşən Mirzə Fətəli Axundovun ev muzeyi Azərbaycanda açılmış ilk xatirə muzeyidir. Muzey iç-içə olan iki kiçik otaqdan ibarət idi. Evin yaxınlığında başqa bir tikili də var. Bu, sonradan inşa edilib və burada böyük yazıçının həyat yolu və yaradıcılığına aid ekspozisiya yaradılıb. M.F.Axundovun ev muzeyi 2 binadan, həyat və yaradıcılığına həsr olunmuş ekspozisiya zalından və Axundovun anadan olduğu evdən ibarətdir.

Ev təxminən 1800-cü ildə yerli memarlıq ənənəsi ilə, çiy kərpicdən inşa olunub, iki otaq, bir eyvan və zirzəmidən ibarətdir. Mərtəbələr arasında ağac konstruksiya var. Buxarısı da binanın şərq üslubunda tikildiyini göstərir. Otaqlarda qədim əşyalar sərgilənir. Vaxtilə həyətdə daş və kərpic divarlar, şərq üslubunda kərpic tağlı darvaza, Mirzə Fətəli Axundovun əmizadələrinə məxsus çiy kərpicdən tikilmiş ikimərtəbəli, zirzəmili başqa bir ev də olub[3].

1975-ci ildə Ekspozisiya zalı tikilib. Mirzə Fətəli Axundzadənin ev-muzeyində 2011 - 2012-ci illərdə təmir işləri aparılıb. Muzeydə 248 eksponat nümayiş etdirilir[4].

Şəkillər[redaktə | HTML redaktə]

Həmçinin bax[redaktə | HTML redaktə]

İstinadlar[redaktə | HTML redaktə]

  1. "M.F.Axundovun ev-muzeyi". sheki.mctgov.az. 5 mart 2020 tarixində arxivləşdirilib. İstifadə tarixi: 5 mart 2020.
  2. "Böyük dramaturqun ziyarətçisiz ev muzeyi - FOTO". news.milli.az. 20 may 2013. 8 noyabr 2013 tarixində arxivləşdirilib. İstifadə tarixi: 5 mart 2020.
  3. "M.F.Axundovun ev muzeyi". sheki.heritage.org.az. 15 aprel 2019 tarixində arxivləşdirilib. İstifadə tarixi: 5 mart 2020.
  4. "Şəkidə M.F.Axundzadənin ev-muzeyi". anl.az. 5 mart 2020 tarixində arxivləşdirilib. İstifadə tarixi: 5 mart 2020.

Ədəbiyyat[redaktə | HTML redaktə]

  1. Axundzadənin ev muzeyi // Azərbaycan Milli Ensiklopediyası : ensiklopediya  : [25 cilddə] (tiraj: 10 000; 608 s.). — Bakı: “Azərbaycan Milli Ensiklopediyası” Elmi Mərkəzi, 2009. —I  c. — Səh. 227. — ISBN 978-9952-441-02-4.