Nurəddin Bədəlov

Nurəddin Bədəlov
Bədəlov Nurəddin İbrahim oğlu
Nurəddin Bədəlov.

Nurəddin Bədəlov (1914–1985) — tanınmış kamança ifaçısı və musiqişünas-pedaqoq.

Haqqında məlumatlar

14 may 1914-cü il tarixdə Nuxada (indiki Şəki) anadan olub.

Təhsili

15 – 16 yaşı olanda Nuxada yaşayan muğam ustadlarından, ilk növbədə tarzənlərdən – Əhməd bəy Tahirovdan və Samovar oğlu Çələbidən, kamançaçılardan Məşədi Yusifdən dərs alıb.

1930-cu ildə Azərbaycan Dövlət Konservatoriyasının şərq şöbəsində kamança ixtisası üzrə təhsil almağa başlayıb.

Əmək fəaliyyəti

1937 – 1947-ci illər arasında Ağdaş rayonunda musiqi müəllimi işləyib.

1947-ci ildən sonra əmək fəaliyyətini Nuxa xalq teatrında, Nuxa/Şəki şəhər mədəniyyət şöbəsinin müəssisələrində, Nuxa/Şəki pionerlər evində davam etdirib.

1951-ci ildə üçüncü çağırış Nuxa rayon zəhmətkeş deputatları Sovetinin dördüncü sessiyasında rayon icraiyyə komitəsi yanında kinolaşdırma şöbəsinin müdiri təyin edilib.

Maraqlı

Bəzi məlumatlara görə Ağdaş rayonunda musiqi müəllimi işləyərkən (1937–1947) gələcəyin tanınmış kaman ustası olacaq kiçik Habil Əliyevə kamança çalmağı öyrədib.

Təltif və mükafatları

• “Əmək igidliyinə görə” medalı (1947).

Vəfatı

19 fevral 1985-ci il tarixdə – 70 yaşında, Şəkidə vəfat edib.

Xatirəsi

M.F.Axundzadə adına Şəki Mədəniyyət Mərkəzinin tabeliyində fəaliyyət göstərən folklor evi Nurəddin Bədəlovun adını daşıyır.

16 may 2024-cü il tarixdə M.F.Axundzadə adına Şəki şəhər Mədəniyyət Mərkəzinin tamaşa zalında anadan olmasının 110 illiyi münasibətilə xatirə gecəsi keçirilib.

Ədəbiyyat

1. Üçüncü çağırış rayon zəhmətkeş deputatları Sovetinin sessiyası // Nuxa fəhləsi : qəzet. — Nuxa: Kirov adına Nuxa mətbəəsi, 1951. — В. 28 noyabr. — № 141 (4.665). — Səh. 1.
2. Məmmədov Ə., Xalıqov F. // Şəki: Alim və ziyalılar. — Bakı: Elm, 2007. — 2 cilddə. — II  cild. — Səhifələrin sayı:  428. — Səh.: 58-59. — 600 nüsx. — ISBN 5-8066-1708-4.
3. Təhmirazqızı S. Nurəddin Bədəlov // Şəkidə ifaçılıq sənəti. — Bakı: Nərgiz, 2016. — Səhifələrin sayı:  224. — Səh.: 60. — 300 nüsx.
4. Tanınmış kamança ifaçısının xatirə gecəsi : [arx. 19 May 2024 - 19 May 2024] // Mədəniyyət qəzeti. — 2024. — 19 may. — Müraciət tarixi: 24.05.2024.