Məmməd Bürcəliyev

Məmməd Bürcəliyev
Bürcəliyev Məmməd İsmayıl oğlu
Məmməd Bürcəliyev.
Doğum tarixi	25 aprel 1914(1914-04-25)
Doğum yeri	Nuxa (indiki Şəki), Nuxa qəzası, Yelizavetpol quberniyası, Rusiya İmperiyası
Vəfat tarixi	25 noyabr 1994 (80 yaşında)
Vəfat yeri	Gəncə, Azərbaycan
Dəfn yeri	Gəncə, Azərbaycan
Vətəndaşlığı	Rusiya İmperiyası→ Azərbaycan Cümhuriyyəti→ SSRİ→ Azərbaycan
Həyat yoldaşı	Sədayə Mustafayeva
Uşağı	Anar Bürcəliyev
Peşəsi	aktyor
Təhsili	N.K.Krupuskaya adına Moskva Dövlət İncəsənət Universiteti, teatr aktyoru və rejissoru fakültəsi (1967–1968)
Fəaliyyət illəri	1935–1994
Teatr	Gəncə Dövlət Dram Teatrı
Mükafatları

Məmməd Bürcəliyev (1914–1994) — tanınmış teatr aktyoru, Azərbaycan SSR xalq artisti. Həmçinin, “Azərbaycanfilm”in istehsalı olan bir neçə bədii filmdə də rol oynayıb.

Haqqında məlumatlar

25 aprel 1914-cü il tarixdə Nuxada (indiki Şəki) anadan olub.

Təhsili

1932-ci ildə 5-illik orta təhsilini başa vurub və Karl Libknext adına fabrik-zavod məktəbinə daxil olub.

1967 – 1968-ci illərdə N.K.Krupuskaya adına Moskva Dövlət İncəsənət Universitetinin teatr aktyoru və rejissoru fakültəsində təhsil alıb.

Əmək fəaliyyəti

1932 – 1935-ci illərdə Nuxa Dövlət Dram Teatrında,

1935 – 1994-cü illərdə isə Kirovabad/Gəncə Dövlət Dram Teatrında çalışıb.

Digər

1948-ci ildə “Yadigar” adlı bir dram əsəri qələmə alıb. Bu dram əsəri 1948-ci ildə SSRİ-də keçirilmiş “Müasir dramaturqların əsərlərinə baxış” festivalında 3-cü dərəcəli mükafata layiq görülüb.

Dövri-nəşrlərdə 75-dən artıq məqalə, resenziya və oçerki çap olunub.

Təltif və mükafatları

• “Azərbaycan SSR əməkdar artisti” fəxri adı – 24 iyul 1955-ci il.
• “Azərbaycan SSR xalq artisti” fəxri adı – 20 may 1958-ci il.

Vəfatı

25 noyabr 1994-cü il tarixdə – 80 yaşında, Gəncədə vəfat edib.

Xatirəsi

Gəncə Dövlət Dram Teatrının yerləşdiyi köhnə Kutaisi küçəsinə onun adı verilmiş, vaxtilə yaşadığı binanın qarşısında xatirə-barelyef lövhəsi vurulmuşdur.

1998-ci ildə “Günəş” nəşriyyatı tərəfindən teatrşünas-tənqidçi Anar Bürcəliyevin “Əsl el adamı” monoqrafiyası çap edilmişdir. Anadan olmasının 95 illik yubileyi münasibəti ilə ANS Televiziyasında onun haqqında “Xoşbəxt bürc altında” televiziya filmi yayımlanmışdır.

Filmoqrafiya

1. Mən ki gözəl deyildim (film, 1968) – əsgər.
2. Dəli Kür (film, 1969) – Allahyar.
3. Firəngiz (film, 1975) – Sürücü.
4. Gözlə məni (film, 1980) – Bəy.
5. Köhnə bərə (film, 1984) – İbrahim.
6. Qəm pəncərəsi (film, 1986) – Rəşid bəy.
7. O dünyadan salam (film, 1991) – Hacı Baxşəli.

Ədəbiyyat

1. Məmmədov Ə., Xalıqov F. Bürcəliyev Məmməd // Şəki: Alim və ziyalılar. — Bakı: Bakı Universiteti Nəşriyyatı, 2002. — 2 cilddə. — I  cild. — Səhifələrin sayı:  582. — Səh.: 75. — 1.000 nüsx.
2. Məmməd İsmayıl oğlu // Azərbaycan Milli Ensiklopediyası : ensiklopediya  : [25 cilddə] (tiraj: 25 000; 592 s.). — Bakı: “Azərbaycan Milli Ensiklopediyası” Elmi Mərkəzi, 2014. —V  c. — Səh. 152-153. — ISBN 978-9952-441-10-9.