İsgəndər Bağbanlı

İsgəndər Bağbanlı
Bağbanlı İsgəndər Lətif oğlu
İsgəndər Bağbanlı.
Doğum tarixi	18 oktyabr 1894(1894-10-18)
Doğum yeri	Nuxa (indiki Şəki), Nuxa qəzası, Yelizavetpol quberiyası, Rusiya İmperiyası
Vəfat tarixi	28 fevral 1974 (79 yaşında)
Vəfat yeri	Bakı, Azərbaycan SSR, SSRİ
Elm sahəsi	kimya
Elmi dərəcəsi	kimya elmləri doktoru
Elmi adı	professor
Təhsili	Alı Pedaqoyi İnstitut, təbiətşünaslıq bölməsi (1924–1929)
Mükafatları

İsgəndər Bağbanlı (1894–1974) — tanınmış kimyaçı alım, kimya elmləri doktoru, professor, Azərbaycan SSR EA Qeyri-Üzvi və Fiziki Kimya İnstitutunun analitik kimya laboratoriyasının rəhbəri. Azərbaycanda analitik kimya məktəbinin yaradıcılarından biri hesab olunur. Elmi kadrların hazırlanmasında xidməti var.

Haqqında məlumatlar

18 oktyabr 1894-cü il tarixdə Nuxada (indiki Şəki) anadan olub.

Təhsili

Nuxada ibtidai təhsil alıb.

1920-ci ildən təhsilini Nuxa fəhlə fakültəsində,

1924 – 1929-cu ilərdə isə Bakıda – Alı Pedaqoyi İnstitutunun təbiətşünaslıq bölməsində davam etdirib.

Əmək fəaliyyəti

1913 – 1920-ci illərdə Nuxada ipəkəyirici fabrikdə fəhlə,

1929 – 1930-cu illərdə Lənkəran Pedaqofi Texnikumunda müəllim,

1930 – 1934-cü illərdə Bakı dənizçilik texnikumunda, “Qırmızı dəmirçi” fabrik-zavod məktəbində müəllim və eyni zamanda Azərbaycan Kənd Təsərrüfatı İnstitutunun analitik kimya kafedrasında laborant,

1934 – 1937-ci illərdə Azərbaycan Geologiya İdarəsində kimyaçı-analitik, Dənizçilik və sənaye texnikumlarında isə müəllim,

1937 – 1940-cı illərdə S.M.Kirov adına Azərbaycan Dövlət Universitetinin analitik kimya kafedrasında assistent,

1941 – 1947-ci illərdə Azərbaycan Dövlət Tibb İnstitutunun ümumi kimya kafedrasında assistent,

1942-ci ildən Azərbaycan Sənaye İnstitutunun ümumi kimya kafedrasında dosent,

1944 – 1959-cu illərdə S.M.Kirov adına Azərbaycan Dövlət Universitetinin analitik kimya və qeyri-üzvi kimya kafedralarında dosent,

1933-cü ildən SSRİ EA Azərbaycan filialının/Azərbaycan SSR EA Kimya İnstitutunda (1959-cu ildən Azərbaycan SSR EA Qeyri-Üzvi və Fiziki Kimya İnstitutu) əvvəlcə laborant, sonra kiçik elmi işçi,

1946 – 1974-cü illərdə isə analitik kimya laboratoriyasının rəhbəri vəzifəsində çalışıb.

Elmi fəaliyyəti

1942-ci ildə kimya elmləri namizədi dərəcəsi almaq üçün “Natrium sulfid və maqnezium oksid olmaq məqsədilə astraxanitin təbii qazla reduksiyası” mövzusunda dissertasiya müdafiə etmişdir. Namizədlik dissertasiyası elmi rəhbər olmadan yerinə yetirilmiş, tərtib və müdafiə edilmişdir.

1960-cı ildə “Ammonium tetrarodanodiaminxromlatın nadir və əlvan metalların analitik kimyasına tətbiqi” mövzusunda doktorluq dissertasiyasını müdafiə etmişdir.

1961-ci ildə analitik kimya ixtisası üzrə professor elmi adını alıb.

170-dən çox elmi əsərin, o cümlədən 1 monoqrafiyanın müəllifidir. 3 elmlər doktorunun və 15 elmlər namizədinin elmi rəhbəri olub.

Təltif və mükafatları

• “Qafqazın müdafiəsinə görə” medalı(1944);
• “1941-1945-ci illər Böyük Vətən müharibəsində rəşadətli əməyə görə” medalı (1945);
• “Qırmızı Əmək Bayrağı” ordeni (1951).

Vəfatı

28 fevral 1974-cü il tarixdə – 79 yaşında, Bakıda vəfat edib.

Ədəbiyyat

1. Məmmədov Ə., Xalıqov F. Bağbanlı İsgəndər // Şəki: Alim və ziyalılar. — Bakı: Bakı Universiteti Nəşriyyatı, 2002. — 2 cilddə. — I  cild. — Səhifələrin sayı:  582. — Səh.: 61-64. — 1.000 nüsx.
2. Şükürov R., Orsər R. Bağbanlı İsgəndər Lətif oğlu // İşıq məbədi. — Bakı: İdeal-Print, 2010. — Səhifələrin sayı:  310. — Səh.: 171-172. — (Ş 4702060200). — 1.000 nüsx. — ISBN 978995244710.
3. Bağbanlı İsgəndər Lətif oğlu // Azərbaycan Milli Ensiklopediyası : ensiklopediya  : [25 cilddə] (tiraj: 25 000; 604 s.). — Bakı: “Azərbaycan Milli Ensiklopediyası” Elmi Mərkəzi, 2011. —III  c. — Səh. 22. — ISBN 978-9952-441-07-9.