Yaşar Bilalov

Yaşar Bilalov
Bilalov Yaşar Mahmud oğlu
Yaşar Bilalov, 1972-ci il.

Yaşar Bilalov (1936–2013) — tanınmış kimyaçı alım-pedaqoq, texnika elmləri doktoru, professor, Azərbaycan Respublikasının əməkdar elm xadimi, Azərbaycan Dövlət Neft və Sənaye Universitetinin yüksəkmolekullu birləşmələrin texnologiyası kafedrasının müdiri.

Haqqında məlumatlar

29 sentyabr 1936-cı il tarixdə Nuxada (indiki Şəki) anadan olub.

Təhsili

1955-ci ildə Nuxa şəhər M.F.Axundov adına 2 №-li orta məktəbini bitirib.

1955-ci ildə Azərbaycan Sənaye İnstitutunun kimya-texnologiya fakültəsinə daxil olub.

1957-ci ildən təhsilini M.V.Lomonosov adına Moskva Zərif Kimya-Texnologiya İnstitutunda davam etdirib.

1962 – 1965-ci illərdə M.V.Lomonosov adına Moskva Zərif Kimya-Texnologiya İnstitutunun aspiranturasına təhsil alıb.

Elmi fəaliyyəti

1965-ci ildə “Protektor rezinlərinin tərkibinin onların mexaniki xassələrinə təsirinin tədqiqi” mövzusunda namizədlik dissertasiyasını,

1987-ci ildə doktorluq dissertasiyasını müdafiə edib.

1988-ci ildə professor elmi adını alıb.

500-dək elmi əsərin, o cümlədən, dərs vəsaitlərinin müəllifidir.

Tədqiqatları polimerlərin modifikasiyası, onların əsasında müxtəlif məqsədli kompozisiyalar alınmasına həsr olunub.

35 elmlər namizədinin, 5 elmlər doktorunun elmi rəhbəri olub.

Əmək fəaliyyəti

1961 – 1962-ci illərdə Bakı şin zavodunda işləyib.

1965-ci ildən M.Əzizbəyov adına Azərbaycan Neft və Kimya İnstitutunda işləməyə başlayıb; əvvəl yüksəkmolekullu birləşmələrin texnologiyası kafedrasında müəllim, sonra baş müəllim, daha sonra dosent,

1972 – 2013-cü illərdə kafedranın müdiri,

1977 – 1982-ci illərdə kimya texnologiyası fakültəsinin dekanı,

1988 – 2013-cü illərdə professor vəzifəsində çalışıb.

Təltif və mükafatları

• “Azərbaycan Respublikasının əməkdar elm xadimi” fəxri adı (2000).

Vəfatı

14 may 2013-cü il tarixdə – 76 yaşında, Bakıda vəfat edib.

Ədəbiyyat

1. Məmmədov Ə., Xalıqov F. // Şəki: Alim və ziyalılar. — Bakı: Bakı Universiteti Nəşriyyatı, 2002. — 2 cilddə. — I  cild. — Səhifələrin sayı:  582. — Səh.: 72-74. — 1.000 nüsx.
2. Mete Ə. Fəxri kimyaçı // O torpağın övladları. — Bakı: Nurlan, 2006. — Səhifələrin sayı:  608. — Səh.: 289-290. — 500 nüsx.
3. Bilalov Yaşar Mahmud oğlu // Azərbaycan Milli Ensiklopediyası : ensiklopediya  : [25 cilddə] (tiraj: 25 000; 608 s.). — Bakı: “Azərbaycan Milli Ensiklopediyası” Elmi Mərkəzi, 2013. —IV  c. — Səh. 34. — ISBN 978-9952-441-03-1.