Firidun Abdullayev

Firidun Abdullayev (1931–1987) — Azərbaycan SSR əməkdar mədəniyyət işçisi və Bakı Dövlət Sirkinin direktoru.

Firidun Abdullayev
Abdullayev Firidun Muxtar oğlu
Firidun Abdullayev.
Anadan olub	31 may 1931(1931-05-31)
Anadan olduğu yer	Nuxa (indiki Şəki), Azərbaycan SSR, ZSFSR, SSRİ
Vəfat edib	1 aprel 1987 (55 yaşında)
Vəfat etdiyi yer	Leninqrad (indiki Sankt-Peterburq)
Vəfat səbəbi	xərçəng
Dəfn yeri	Bakı
Həyat yoldaşı	Valentina
Uşaqları	Rauf, Yuliya və Murad
Atası	Abdullayev Muxtar Nağı oğlu
Anası	Abdullayeva (Kaşiyeva) Həyat Əbülfəz qızı
Vətəndaşlıq	SSRİ
Təhsili	• Orta-ixtisas musiqi məktəbi  • Moskva Dövlət Sirk və Estrada Sənəti Məktəbi, qiyabi
Mükafatları

Haqqında məlumatlar

Firidun Abdullayev, gənclik şəkli.

31 may 1931-ci il tarixdə Nuxada (indiki Şəki) anadan olub.

Səkkizillik təhsildən sonra, əvvəl orta-ixtisas musiqi məktəbini, daha sonralar isə qiyabi olaraq Moskva Dövlət Sirk və Estrada Sənəti Məktəbini bitirib.

Əmək fəaliyyəti

Firidun Abdullayev, Sirkin direktoru olarkən, kabinetdə.

Orta-ixtisas musiqi məktəbini bitirdikdən sonra müxtəlif ansambllarda nəfəs alətlərində (saksafon, fleyta və truba) ifa edib. Bir müddət Şimali Qafqazda yaşayıb və fəaliyyət göstərib. 1965-ci ildə Bakıya qayıdıb.

1967-ci ildən Bakı Dövlət Sirkinin direktor müavini, 1969-cu ildən ömrünün sonunadək isə direktoru olub.

Təltif və mükafatları

• “Azərbaycan SSR əməkdar mədəniyyət işçisi” fəxri adı.

Vəfatı

1 aprel 1987-ci il tarixdə – 56 yaşa keçməsinə iki ay qalmış, Leninqradda (indiki Sankt-Peterburq) müalicə aldığı xəstəxanada xərçəng xəstəliyindən vəfat edib. Bakıda anasının dəfn olunduğu qəbiristanlıqda – anasının qəbrinin yanında dəfn olunub.

Ailəsi

Ailədə 7 qardaş və 2 bacı olublar.

1937-ci ildə – 6 yaşı olarkən, atası Muxtar Abdullayev Stalin repressiyaları nəticəsində həbs edilib və güllələnib. Anası Həyat Əbülfəz qızı Abdullayeva (Kaşiyeva) isə Sibirə sürgün olunub. Hər ikisi Stalinin ölümündən sonra – 1956-cı ildə, bəraət alıblar.

Firidun Abdullayevin özü 3 dəfə ailə qurub. Birinci həyat yoldaşı ilə Batumidə qastrolda tanış olmuşdu. Ondan Rauf adlı oğlu doğulub. Hal-hazırda Rauf Batumidə yaşayır, zabitdir. İkinci həyat yoldaşından Yuliya adlı qızı doğulub. Üçüncü həyat yoldaşı Valentina ilə isə Şimali Qafqazda tanış olmuşdu. Onunla 1965-ci ildə Bakıya gəlib. Bakıda oğlu Murad anadan olub. Murad Abdullayev hal-hazırda Böyük Moskva sirkinin tanınmış meymun təlimçisi və Rusiya Federasiyasının əməkdar artistidir və Murad Abdullayevin qızı Aydan Abdullayeva da sirkdə işləyir.

Ədəbiyyat

1. Məmmədov Ə., Xalıqov F. Abdullayev Firidun // Şəki: Alim və ziyalılar. — Bakı: Elm, 2007. — 2 cilddə. — II  cild. — Səhifələrin sayı:  428. — Səh.: 26. — 600 nüsx. — ISBN 5-8066-1708-4.