Nərgiz Əsgərzadə

Nərgiz Əsgərzadə
Əsgərzadə Nərgiz Saleh qızı
Nərgiz Əsgərzadə.
Doğum tarixi	15 avqust 1929(1929-08-15)
Doğum yeri	Bakı, Azərbaycan SSR, ZSFSR, SSRİ
Vəfat tarixi	1 oktyabr 2016 (87 yaşında)
Vəfat yeri	Bakı, Azərbaycan
Dəfn yeri	Şəki, Azərbaycan
Elmi dərəcəsi	memarlıq elmləri namizədi
Təhsili	Azərbaycan Politexnik İnstitutunu (–1951)
Mükafatları

Nərgiz Əsgərzadə (1929–2016) — memarlıq elmləri namizədi və Azərbaycan SSR əməkdar arxitektoru.

Haqqında məlumatlar

15 avqust 1929-cu il tarixdə Bakıda pedaqoq ailəsində anadan olub.

Təhsili

1951-ci ildə Azərbaycan Politexnik İnstitutunu bitirib.

Əmək fəaliyyəti

1971 – 1990-cı illərdə Azərbaycan SSR Nizami adına Ədəbiyyat Tarixi Muzeyinin direktor müavini olub.

1990 – 2007-ci illərdə AMEA Şəki Regional Elmi Mərkəzinin elmi işlər üzrə direktor müavini vəzifəsində çalışıb. Həmçinin mərkəzdəki “El sənətləri” qrupuna da rəhbərlik edib.

2007-ci il avqustun 1-də görmə qabiliyyətinin zəifləməsi səbəbindən öz xahişi ilə işdən çıxıb.

Elmi fəaliyyəti

1961-ci ildə namizədlik dissertasiyasını müdafiə edərək memarlıq elmləri namizədi elmi dərəcəsi alıb.

4 monoqrafiyanın, 6 kitabın və 42 dərc olunmuş elmi məqalənin müəllifidir.

Təltif və mükafatları

• “Azərbaycan SSR əməkdar arxitektoru” fəxri adı (3 oktyabr 1986).

İctimai aktivliyi

Azərbaycan SSR EA Partiya komitəsi katibinin müavini, daha sonra Azərbaycan SSR EA Qadınlar Şurasının sədri olmuşdur.

Digər

2007-ci ildə səhhəti ilə bağlı olaraq, öz xahişi ilə AMEA Şəki Regional Elmi Mərkəzində işdən azad edilmiş, lakin şəxsi kitabxanasını AMEA Şəki Regional Elmi Mərkəzinə bağışlamışdır.

Vəfatı

1 oktyabr 2016-cı il tarixdə – 87 yaşında, Bakıda vəfat edib. Şəkidə dəfn olunub.

Ailəsi

• Atası: Saleh Əsgərzadə – Nuxadan Bakıya köçənlərdən idi. Azərbaycan Dövlət Neft və Sənaye Universitetində 36 il riyaziyyat müəllimi işləyib. Mövsüm Salamovun böyük qardaşı olub.
• Anası: Həmidə Əsgərova – Hacı Zeynalabdin Tağıyevin qızlar məktəbinin məzunu idi. Ədəbiyyat müəllimi olub – Bakı kəndlərində qadın savadsızlığının ləğv olunmasında fəal iştirak edib. Bir çox görkəmli ziyalının, o cümlədən, xalq yazıçısı İlyas Əfəndiyevin müəllimi olub.
• Bacı-qardaşları: Ruhəngiz və Firəngiz adlı iki bacısı, Çingiz və Pərviz adlı iki qardaşı olub. Pərviz ailənin sonuncu övladı olsa da çox erkən yaşlarında, hələ aspiranturada təhsil alarkən dünyasını dəyişib.
• Həyat yoldaşı: Məmməd Rəhimov – ixtisasca mühəndis-energetik idi. Atası Şəkidə fabrik sahibi olmuşdu.
• Uşaqları: Nigar – memar; Nicat – ingilis dili mütəxəssisi, müsiqiçi.

Xatirə gecəsi

20 Fevral 2017-cı il tarixdə Azərbaycan Memarlar İttifaqının binasında təşkil olunmuş Nərgiz Əsgərzadənin xatirə gecəsi iştirakçilarından bir qurup.

20 Fevral 2017-cı il tarixdə Azərbaycan Memarlar İttifaqının binasında xatirə gecəsi keçirilib. Gecədə ölkənin tanınmış memarları, Bakıda və Şəkidə vaxtilə onunla birlikdə işləmiş həmkarları, eləcə də qohumları və ailə dostları iştirak ediblər. Tədbirin sonunda həyat və yaradıcılığına həsr olunmuş qısametrajlı film nümayiş etdirilib.

Ədəbiyyat

1. Məmmədov Ə., Xalıqov F. Əsgərova Nərgiz Saleh qızı // Şəki: Alim və ziyalılar. — Bakı: Bakı Universiteti Nəşriyyatı, 2002. — 2 cilddə. — I  cild. — Səhifələrin sayı:  582. — Səh.: 146-147. — 1.000 nüsx.;
2. Nərgiz Əsgərzadənin xatirə gecəsi : [arx. 14.08.2021] // Azərbaycan Memarlar İttifaqı. — 2017. — 20 fevral. — Müraciət tarixi: 14.08.2021.
3. Əməkdar memar Nərgiz Əsgərzadə : [arx. 14.08.2021] // “Şəki bələdiyyəsi” qəzetinin saytı. — 2016. — 2 oktyabr. — Müraciət tarixi: 14.08.2021.
4. Firəngiz Əsgərzadə, Bizim nəsil.